Ang token ng World para sa lahat

Ang WLD token contract ay naka-deploy sa Ethereum mainnet, at ang token naman ay naka-bridge o nakakonekta sa World Chain “layer 2” network. Gayunpaman, inaasahan ng World Foundation na magaganap pa rin sa World Chain ang karamihan ng mga transaksyon sa WLD token, dahil dito natatanggap ng mga beripikadong user ang mga token nila. Bukod pa rito, ang World Chain network na talaga ang pangunahing network na ginagamit ng World App. Napili ang World Chain kaysa sa Ethereum bilang pangunahing platform dahil kaya nitong magsagawa ng mas maraming transaksyon at mas mura ang bayad (gas fees). Ang lumang naka-bridge na bersyon ng WLD ay nasa Optimism pa rin.

Sa ngayon, hindi pa sinisingil ng gas fees ang mga user ng World App. Ang bayad para sa pagkuha ng mga WLD token, pakikipagpalitan at iba pang transaksyon ay sagot muna ng TFH. Sa susunod, posibleng kailanganin nang maningil ng World App sa mga user ng gas fees para sa ilang partikular na hakbang, gaya ng pagpapadala sa ibang wallet. Kapag naman ipinaberipika ng user ang pagkakakilanlan nila sa ibang application gamit ang World ID, wala silang babayarang gas fees para sa protocol. Gayunpaman, maaari pa ring maningil ng gas fees o iba pang bayad ang mga third-party application mula sa user kapag nagpaberipika sila (depende kung dumaan ito sa system nila o hindi). Halimbawa, kapag ginamit ng user ang swap feature sa World App, kailangan nilang bayaran ang anumang singil ng mga third-party platform. Puwedeng singilin ang mga user ng gas fees para sa mga transaksyong hindi dumaan sa World App, depende sa platform at chain na ginagamit nila para sa transaksyon.

Ang karamihan ng mga token ng World Community ay nakalagay sa isang cold wallet, o wallet na hindi konektado sa internet. Maliban pa rito, gumagamit din ang World Foundation at World Assets, Ltd. ng ilan pang hot wallet, o wallet na konektado sa internet, para sa pang-araw-araw nilang operasyon. Karaniwang panandalian lang inilalagay ang mga token sa mga hot wallet na ito, at kung ilan lang ang kailangan, iyon lang ang itinitira roon.

Hindi na puwedeng i-upgrade ang WLD token contract. Walang sinuman ang may kontrol sa kontratang ito, maliban na lang sa pagtatakda ng “minter” address sakaling magdesisyon ang community na dagdagan ang supply. Sa loob ng 15 taon mula nang ilabas ito, walang address ang makakapag-mint ng bagong token. Pagkalipas ng 15 taon, puwede nang mag-mint ang "minter address" (na kontrolado ng protocol governance) ng hanggang 1.5% bagong WLD token kada taon. Ang governance din ang magdedesisyon kung paano ipamamahagi ang mga ito.

Ang World Foundation ay isang exempted limited guarantee foundation company na nakarehistro sa Cayman Islands. Ito ay “memberless.” Ibig sabihin, wala itong shareholder o beneficial owner. Nakarehistro ang opisina nito sa Suite 3119, 9 Forum Lane, Camana Bay, George Town, Grand Cayman KY1-9006, Cayman Islands. Ayon sa Articles of Association o Kasunduan sa Pagtatatag ng Korporasyon nito, ang pangunahing layunin ng World Foundation ay suportahan at hubugin ang kakayahan ng mga bumubuo para World ecosystem. Isinusulong din nito ang ang desentralisasyon ng mga teknolohiya at pamamahala ng World. Ito ang may hawak ng mga intellectual property o yamang isip ng World Network, at ito rin ang tumatanggap, nagbebenta, nagtatabi, nagpapahiram at gumagamit ng mga asset para maisakatuparan ang mga layuning ito.

Ang World Assets, Ltd. ay isang kumpanyang inirehistro sa British Virgin Islands noong Disyembre 7, 2022 at may BVI Company Number na 2113558. Ang World Foundation ang kaisa-isang miyembro/direktor ng World Assets, Ltd. Ang World Assets, Ltd. ang nasa likod ng paglalabas ng 7.5B Worldcoin token (WLD) na inilaan para sa World community.

Ang World Chain LLC ay isang limited liability company na itinatag sa Cayman Islands. Ang World Foundation ang kaisa-isang miyembro at tagapamahala nito. Ang World Chain LLC ang may hawak sa imprastraktura ng World Chain at siya ring nagpapatakbo nito.

Matatagpuan ang higit pang impormasyon tungkol sa mga entidad na ito, kabilang na ang dokumentasyon ng pagkakatatag at komposisyon ng pagmamay-ari sa foundation.world.org/about.

Ang Tools for Humanity (TFH) ay isang korporasyon mula sa Delaware na may punong-tanggapan sa San Francisco, California (US). Mayroon din itong sangay na pag-aari nito nang buo, ang Tools for Humanity GmbH na nakabase naman sa Germany. Nakarehistro ang opisina nito sa CSC 251 Little Falls Drive, Wilmington, Delaware 19808. Nagparehistro ito noong Hunyo 26, 2019 at ang legal entity number nito ay 7487684. Sinuportahan ng TFH ang World sa loob ng ilang taon bago ito opisyal na inilunsad. Sa panahong ito, binuo nito ang Orb, ang unang bersyon ng protocol, at ang World App, ang unang wallet para sa World na pinatatakbo pa rin nito hanggang ngayon. Ganap itong pinamamahalaan nang hiwalay sa World Foundation. Itinatag ang TFH noong 2019 at mayroon nang humigit-kumulang 500 katao sa team nito. Gayunpaman, ang World ay isang open protocol. Kahit sino ay puwedeng tumulong at mag-build dito.